"مقبرة الفيس أم منبر النفس؟"

بقلم الدكتورة مروة الخطيب

هل الفيسبوك بقى مقبرة لأفكارنا؟
هل بقينا بندفن نفسنا بالحروف، واللايكات، والتفاعلات…
ولا لسه عندنا فرصة نحوله لـ منبر حقيقي للنفس؟

منصة كانت في بدايتها وسيلة للتواصل،
بقت النهارده وسيلة للتشتت، للغرور، للمقارنة، وأحيانًا للضياع.

مقبرة الفيس؟ ليه؟

لأننا بندفن مشاعرنا في بوستات مفيهاش روح.
بندفن صِدقنا وراء ابتسامات فلتر وكلمات منقولة.
بندفن وقتنا، أعصابنا، وعلاقتنا مع ربنا... قدّام شاشات وهمية.

بقينا نكلم الناس… وننسى نفسنا.
ننزل بوستات تحفيزية… وإحنا مكتئبين.
نضحك أونلاين… ونبكي تحت البطانية.

طيب… ممكن يبقى منبر للنفس؟

أكيد! بس لما نستخدمه بوعي:

نشارك الخير، مش الغرور

نذكّر بعض، مش نفضح

ننشر نور، مش نُصَدّر الهمّ

نكتب عشان نفيد، مش نلمّ لايكات

الفيس مش هو المشكلة
إحنا... إزاي بنستخدمه؟!

سؤال بيوجع شوية

إنت بتستخدم فيسبوك علشان تهرب من نفسك؟
ولا علشان "تسمع صوت نفسك"؟
هل بتدفن وجعك جوا سطر، ولا بتحاول تحيي غيرك بكلمة؟

كفاية دفن...

خلي صفحتك منبر، مش مقبرة
خليها ذكر، مش سيرك
خليها وعي، مش واجهة اجتماعية

ابدأ بنفسك…
وكل بوست تكتبه يكون صدقة جارية… مش سيئة جارية

وييجي هنا النداء الحقيقي

يلا كل واحد فينا من النهاردة يبدأ يعمل منبر ثقافي لنفسه!
خلي صفحتك منبرك
قدّم أي معلومة، أي خبرة، أي فكرة
أياً كان شغلك أو ثقافتك من عامل بسيط لأكبر قيادي

فيد غيرك باللي اتعلمته
حتى لو هتعمل فيديو تعليمي لحرفة أو صنعة أو مهارة بسيطة
أو هتكتب فكرة غيرت فيك حاجة

شارك علمك، حِكمتك، تجربتك
لأن اللي عندك ممكن يكون سبب هداية، أو رزق، أو وعي لحد تاني

ولو حاسس إنك عايز تبدأ ومش عارف...
أنا بابي مفتوح لأي حد عايز يقدم معلومة ومش عارف يصيغها
ابعتها لي، وأنا هكتبها لك
باسمك، وبصدق، وبإخلاص، وبدون أي مقابل
وانت تنشرها على صفحتك وتكون سبب نور في حياة حد

خلينا كلنا ندعم بعض

نستخدم الفيس كمنبر... مش كمقبرة ندفن فيها علمنا وثقافتنا

ده دورنا
دي رسالتنا
وده حق مجتمعنا علينا

لازم يكون ليك بصمة
يلا نساعد بعض
ونبني أكبر منبر ثقافي لما كل واحد يقدّم علمه على منبره الفيسي
قناع الإنستا أم وجه الحقيقة؟

فلتر للوجه أم غشاوة للقلب؟

ذكرٌ يحيي أم غفلة تميت؟

منبّه الحياة أم منبّه الهاتف؟

ستر البنت أم فتنة التيك توك؟

شهرة فارغة أم قيمة ناطقة؟

نور السوشيال أم سمّ الغفلة؟

جمال الروح أم تجميل الاستوريات؟

لايك من الناس أم رضا ربّ الناس؟

بنت مصابة أم بنت "مصانة"؟